Uchaguzi DRC: Kanisa Katoliki lasema kuna mshindi wa wazi uchaguzi wa urais

Serikali ya Jamuhuri ya Kidemokrasia ya Kongo (DRC), imekemea ushawishi unaotolewa na kanisa Katoliki unaodai kuwa wanajua kiongozi aliyeshinda katika uchaguzi wa rais.

Barnabe Kikaya Bin Karubi ambaye ni msemaji wa 'Common front for the Congo', ameiambia BBC kuwa "Jambo linalofanywa na kanisa ni kitu ambacho hakikubaliki, ni sawa na kuwaandaa watu kufanya mapinduzi".

Serikali ya mseto imesisitiza kwamba ni Tume ya uchaguzi peke yake ndio inaweza kutangaza matokeo ya uchaguzi.

• Matokeo ya uchaguzi wa urais DRC 'kuchelewa'
• Huduma ya intaneti yafungwa DR Congo siku moja baada ya uchaguzi
• Wagombea wa upinzani walalamikia dosari uchaguzi DRC

Kanisa Katoliki, ambalo lina ushawishi mkubwa nchini Jamhuri ya Kidemokrasia ya Congo, limesema kuwa kuna mshindi wazi wa urais katika uchaguzi uliofanyika Jumapili, kwa mujibu wa matokeo ambao wamefanikiwa kuyaona.

Maaskofu wa kanisa hilo wamewataka watawala nchini humo kuwa wakweli na kutangaza matokeo hayo karibuni.

Kanisa hilo lina maelfu ya wangalizi wa uchaguzi nchini humo na baadhi wamewasilisha ripoti za dosari kadha wa kadha.

Image captionKanisa Katoliki limesema linafahamu nani alishinda uchaguzi, lakini halijataja jina lake

Tume ya uchaguzi ilitarajiwa kutangaza matokeo Jumapili lakini wiki hii ilidokeza kuwa huenda ikachelewa kufanya hivyo kwani bado haijapokea matokeo kutoka vituo vingi vya kupigia kura nchini humo.

Mkuu wa Tume ya Taifa ya Uchaguzi (CENI) Corneille Nangaa alisema matokeo zaidi ya asilimia 80 ya kura bado yanasubiriwa.

Upinzani pia umelalamikia dosari kwenye uchaguzi huo.

Rais Joseph Kabila anatarajiwa kuondoka madarakani baada ya kuongoza kwa miaka 17 na ameahidi kukabidhi madaraka kwa atakayeshinda uchaguzi.

Haki miliki ya pichaREUTERS

Image captionMaafisa bado wanahesabu na kutathmini matokeo ya uchaguzi huo wa Jumapili

Baraza la Taifa la Maaskofu Congo (Cenco) halikusema nani linaamini alishinda uchaguzi huo.

Kanisa hilo limekuwa likipinga kuongezwa kwa muda wa Rais Kabila madarakani, tangu uchaguzi ulipoahirishwa mara kadha.

Wagombea wakuu wa urais DR Congo

MARTIN FAYULU (MUUNGANO WA LAMUKA)Muungano wa Lamuka

• Alizaliwa Kinshasa 21 Novemba 1956
• Ni Mkristo
• Anafahamika kama mwanajeshi wa wananchi, aliongoza maandamano dhidi ya Rais Joseph Kabila
• Alifanyia kazi Exxon Mobil kwa miaka 20 years, alistaafu 2003 akiwa mkurugenzi mkuu wa afisi ya kampuni hiyo Ethiopia
• Alichaguliwa mbunge 2006 na 2011
• Alianzisha chama cha Commitment for Citizenship and Development (ECiDé) mwaka 2009

EMMANUEL RAMAZANI SHADARYCommon Front for Congo (FCC)

• Alizaliwa 29 Novemba 1960 Kasongo, mashariki mwa DR Congo
• Mshirika wa muda mrefu wa Rais Kabila
• Aliteuliwa waziri wa mambo ya ndani 2016
• Amewekewa vikwazo na EU kwa tuhuma za ukiukwaji wa haki za binadamu katika kujaribu kuzima maandamano ya upinzani
• Anafahamika kwa ukali wake na kutotetereka, na jina lake la utani ni "make-it-happen" (fanikisha).

FELIX TSHILOMBO TSHISEKEDIUnion for Democracy and Social Progress (UDPS)

• Alizaliwa Kinshasa 13 Juni 1963
• Lina lake la utani ni Fatshi, ufupisho wa Felix Antoine Tshilombo
• Babake alianzisha chama cha UDPS mwaka 1982
• Alikwenda Ubelgiji mwaka 1985
• Alisomea biashara na utangazaji wa mauzo
• Aliteuliwa kiongozi wa UDPS Machi 2018
• Ameahidi kupatia kipaumbele vita dhidi ya umaskini

Bw Kabila awali alitarajiwa kuondoka madarakani 2016 lakini uchaguzi ukaahirishwa kutokana na kile serikali ilisema ni kutokamilika kwa maandalizi.

Mtandao na TV

Huku matokeo yakisubiriwa, serikali imefungia matangazo ya runinga inayomilikiwa na mwanasiasa wa upinzani.

Msemaji wa upinzani Lambert Mende aliituhumu Canal Congo kwa kutangaza matokeo ya uchaguzi kabla ya matangazo rasmi kutolewa.

• EU yalaani balozi wake kufurushwa DRC
• Uchaguzi DRC wazidi kuingia dosari
• Mgombea mkuu wa upinzani DRC Martin Fayulu ni nani?

Hatua hiyo imejiri siku chache baada ya huduma ya mtandao wa intaneti kuzimwa taifa lote.

Canal Congo inamilikiwa na mbabe wa kivita wa zamani Jean Pierre-Bemba.

Haki miliki ya pichaAFP

Image captionMashine za kielektroniki zilitumiwa katika shughuli ya kupiga kura kwa mara ya kwanza

Alizuiwa kuwania kutokana na kupatikana na hatia ya kuwahonga mashahidi katika Mahakama ya Kimataifa ya Uhalifu (ICC) wakati wa kesi yake ya uhalifu wa kivita.

• EU yalaani balozi wake kufurushwa DRC

• Mahakama DRC: 'Jean-Pierre Bemba hana sifa ya kuwa rais'
• Jean Pierre Bemba aachiliwa huru

• Msafara wa Moise Katumbi walazimishwa kurudi Zambia

Anamuunga mkono mfanyabiashara Martin Fayulu.

Pamoja na kuifungia Canal Congo, seriali pia imefungia matangazo ya Radio France Internationale (RFI) na kufuta kibali cha mmoja wa waandishi wake, Florence Morice, wakimtuhumu kwa kuvunja sheria za uchaguzi.

Waangalizi wa uchaguzi wa Umoja wa Afrika na Jumuiya ya Maendeleo ya Kusini mwa Afrika wameeleza uchaguzi huo wa Jumapili kama ulioendeshwa vyema.

Haki miliki ya pichaAFP/REUTERS

Image captionWagombea wa upinzani Martin Fayulu (kushoto) na Felix Tshisekedi (kulia) watakabiliana na Emmanuel Shadary (katikati ), aliyekuwa waziri wa maswala ya ndani.

Nani waliwania?

Kulikuwa na wagombea 21 lakini watatu ndio wakuu:

• Emmanuel Ramazani Shadary, Waziri wa zamani wa mambo ya ndani na mtiifu kwa Kabila, ambaye aliwekewa vikwazo na Muungano wa Ulaya kwa hatua zilizochuliwa upinzani wakati wa maandamano ya mwaka 2017.
• Martin Fayulu, Mkurugenzi mkuu wa zamani wa mafuta ambaye ameahidi nchi yenye mafanikio lakini ambaye watu maskini wanahisi hawezi kuwatetea.
• Felix Tshisekedi Tshilombo, Mtoto wa mwanasiasa mkongwe ambaye ameahidi kupambana na umaskini.